韓國水木劇(逢周三及周四播出)再次掀起大戰,由兩大韓流天王天后主演嘅新劇噚晚同日首播,呢對《浪漫滿屋》情侶宋慧喬同Rain都分別有新劇首播,當中喬妹孖退伍回歸嘅宋仲基出演嘅KBS《太陽的後裔》,對撼Rain同李敏貞和吳漣序主演嘅SBS《回來吧大叔》。
「雙宋」首度攜手拍劇成績十分亮麗,接檔上周結局、由張赫主演吧《生意之神-客主2015》,首播即錄得14.3%佳績,成為同時段收視冠軍,撼贏同日首播嘅Rain主演嘅《回來吧大叔》,Rain今次主演浪漫喜劇,認真出師不利,噚晚首播只得6.6%,比起佢前年主演嘅《對我而言可愛的她》首播收視8.2%成績更差,似乎Rain要出盡法寶贏收視。
而《太陽的後裔》首播收視成績比上周接檔嘅《客主》結局嘅11.2%,高出成3.1%,首播收視突破雙位數係非常好嘅成績,喬妹可謂飲得杯落。
另外,同時段由張娜拉主演嘅MBC《再一次HappyEnding》收視僅得5.0%,繼續包尾墊底。