大生銀行後人馬清揚與老婆錢慧儀今年7月驚傳婚變，至今冷戰8個月。今日再爆出男方有婚外情，疑似新歡係烏克蘭金髮索模Ksenia B.，更指二人今日會出發去峇里外遊，本報就只見到Ksenia今朝出現機場嘅國泰頭等櫃位辦登機手續，但就未有發現馬清揚蹤影，而馬清揚接受本報訪問就否認有婚外情，亦表示不認識Ksenia。

根據讀者資料，有指馬清揚與Ksenia已有兩年婚外情，Ksenia獲對方喺中上環某精品公寓酒店提供「私竇」住，而Ksenia更生活富貴，見佢喺ig都不時分享自己嘅奢華生活如遊船河、坐私人直升機，去大馬睇一級方程式。而眾所周知，馬清揚熱愛賽車，更不時會去世界各地參加賽車活動。翻查資料，Ksenia B.所屬模特兒公司係Starz People，身高5尺10、三圍31B、23、35。佢來港多年，都唔算有知名度，但生活就過得奢華，入住高級酒店、出埠旅行，好似今日去峇里就坐頭等出發。

本報連日就喺讀者提供地址嘅精品公寓酒店「私竇」守候，前日就發現Ksenia確喺上址入住，當時大概晏晝3點幾，佢一身運動套裝造型離開酒店，獨自急步行去附近一間五金舖買螺絲類零件，之後再步行去中環蘭桂坊一商業大廈嘅修甲店，相信佢喺香港發展咗一段時間，見佢全程都好熟悉中上環路，佢喺修甲店留咗兩小時修甲扮靚，之後就大概7點鐘離開，再步行返下榻酒店。

噚日，Ksenia再喺酒店出現，大概3點幾佢一個人拎住一大袋嘢出發，由上環行到去中環郵政總局，原來佢去寄包裹，佢用咗近20分鐘細心整理包裹，辦妥後就離開，步行到ifc嘅高檔超市買食物，佢喺超市入面逗留近40分鐘，其間不時玩手機，亦有講電話，最後買咗水果、蔬菜同芝士等食物後，向上環方向步行返酒店。