《蘋果日報》網上版噚日開始收費，八方相信唔少《蘋果》讀者已經畀錢支持，但有啲讀者唔識點課金，第一時間搵咗區議員幫忙。好似民主派沙田區議員陳兆陽（圖）咁吖，佢今日就喺fb出po，話唔少街坊唔知如何付款，有見及此，佢會協助各位街坊登記同訂閱，總之去佢辦事處或者打畀佢就得嘞。八方聽聞唔少區議員同陳兆陽一樣，熱心協助居民訂閱《蘋果》，覺得要一齊喺持續嘅「反送中」運動中，同呼同吸，八方聽完都好滾動！

八方問過陳兆陽，佢話有街坊落嚟佢辦事處話：「以為冇咗上網所以睇唔到《蘋果》」，更有街坊指：「睇唔到《蘋果》瞓唔着覺」，所以盡力協助佢哋訂閱。佢話要用信用卡付款，對長者嚟講真係唔多方便，希望《蘋果》諗吓，可唔可以增設到便利店現金付款呢個途徑？

民主黨立法會議員尹兆堅話，噚日至少有十幾名街坊，特別係中老年人士，紛紛打去或者走入佢嘅地區辦事處，話睇唔到《蘋果》，唔知點算好？佢啲職員細心講解，《蘋果》要收費嘞，都希望街坊多多支持。如果有信用卡嘅街坊，職員都會問准佢哋後協助登記，冇嘅就教佢哋以其他方法訂閱，又或者畀啲方法佢哋搵屋企人幫忙，總之務求人人都繼續睇到《蘋果》，佢話呢排反送中新聞好多人關心，一定會盡量幫忙繼續凝聚民意，笑指：「冇得睇《蘋果》、冇得睇動新聞對呢啲街坊嚟講，同年輕人冇咗fb、WhatsApp一樣好大件事。」