會計界嘅ACCA與香港嘅會計師公會（HKICPA）因會籍互認問題，鬧得好唔愉快。照計如果CPA唔承認ACCA，即係考ACCA及格嘅人士，唔能夠再只係考番三四科有關本港實務嘅科目就成為香港註冊會計師CPA，關係有幾大呢？以香港人嘅精叻法，識走位，以後一定唔考ACCA，成副精神擺落去考香港CPA；至於已經考咗ACCA，重未成為CPA嘅人士，就唔好彩咯，話唔定要從頭嚟過。英國ACCA除咗冇晒尊嚴之外，亦都失去大量入會費。

分析師艾力就覺得唔妥，因為ACCA係國際性，中國大陸有好多ACCA學生，如果佢哋考到，而香港會計師公會唔承認，咁會唔會阻礙兩地嘅會計合作呢？再者，香港已經唔夠會計師用，𠵱家會計師公會限制ACCA，邊度夠人做嘢呀？
呢日喺酒會碰到會計大哥，問佢究竟點搞㗎？大哥話：「會計師公會實在過份。過去幾十年，ACCA資格成為香港會計師嘅專業踏腳石，ACCA幫助香港會計師公會好大；正如大家姐苦心培育細妹成材，細妹長大成人，搵到份好工之後，識得一個靚仔博士，就立即叫大家姐搬走，咪阻住佢，你話大家姐㷫唔㷫呢？」
入會計師專業團體，一定要交入會費。英格蘭與威爾斯特許會計師公會（CA）素來巴閉，得到CA資格嘅人，以為比ACCA高級啲。香港會計師公會踢開ACCA，改與CA互認資格之後，香港CPA唔爭住加入CA，攞番個銜頭先至奇。大哥大話CA入會費係兩萬元，一萬人加入就令CA無端端增加兩億元（一千四百餘萬鎊），發達咯，以後重有年費呢！CA之得就係ACCA之失，會計師咁識計數，有乜辦法唔嘈餐死。