單身多年嘅黃山怡（糖妹），雖然今年感情線上繼續係單身過聖誕，但出席聖誕活動就多咗位身邊人，佢今日帶埋師弟伍定彥（Don）去到九龍城廣場出席聖誕亮燈儀式，貴為公司年資最耐，理應叫做大師姐，不過糖妹強調自己係小師姐唔肯認大。同師弟一齊出騷合唱，令佢勾起以前《糖兄妹》感覺。

今年糖妹將會乖乖喺屋企陪家人度聖誕，亦準備了按摩器給父母做禮物，同埋唔入廚房搗亂，而樓價回落，佢希望出年能夠成功置業成為業主，佢話：「原本諗住買大屋同父母一齊住，但負擔唔起，可能喺屋企附近買個細單位。」

師弟Don本身拿手唱失戀歌，原來佢都有幾次失戀經驗，佢話：「讀書時試過追到個女仔，點知一個禮拜後佢嫌我悶，跟住分手。」現時感情生活空白，寄情音樂。