無綫劇《宮心計2深宮計》被世界盃追擊，收視慘敗，但無損劇中演員人氣，好似「南宮司設」康華與「成內寺」韋家雄呢一對「神交」情緣，令人睇到好肉緊。

現實中嘅康華緋聞一向唔多，近日卻被爆曾與一名喺美國超市嘅富貴華僑阿Ken結婚，並在當地生活過一段時間，可惜最後仍是分手收場。康華經常慨嘆緣份難求，仲自爆Dry咗十年冇拍拖，希望留多啲時間陪住年過80歲嘅患病父母。

日前下午三時許，康華又做孝順女，陪父母到將軍澳Popcorn一間餐廳食下午茶。康華紮起髮髻，素顏兼戴住眼鏡，但望落清秀，點睇都唔似46歲。康華推住坐喺輪椅上嘅爸爸入餐廳，媽媽一直尾隨在後，見康華好小心咁扶爸爸起身由輪椅轉坐普通櫈，由於康華體形較瘦弱，要扶起爸爸都有點吃力，最後要媽媽同餐廳待應合力先搞得掂。

坐低之後，康華不停問父母想食乜，揀咗十幾分鐘。到有食物嚟，康華又先照顧爸爸，因為爸爸一宜插住鼻喉，但除口罩時唔小心整甩咗，康華即時眉頭一皺，幫爸整番好。見康華一直都表現得好緊張，連爸爸今湯都定眼望到實，等爸爸完全安頓好，佢先開始食嘢。大約一小時後，康華埋單離開，之後再同父母去附近嘅連鎖時裝店買衫畀爸爸，佢逐件試吓質地好唔好，好先再問爸爸鍾唔鍾意個款，真係細心。

康華噚日回覆傳媒時解釋﹕「係呀，爸爸身體一向比較虛弱，病情較反覆，所以要特別小心照顧佢，一復發就會好嚴重。」康華透露爸爸剛出院兩日，下月又要再入院做手術，佢話﹕「佢係醫院話好悶，所以一有時間就陪下兩個老人家庭樂。佢上次做完一個手術後落晒形，啱啱先肥返少少，正常返少少，始終年紀大做手術都有危險性，爸爸同我哋都好擔心，擔心好難恢復得好好。」據悉康華父母都患有心臟病，令佢無時無刻都好心，所以曾經有大陸劇斟合作，但佢為防父母有意外，都會推卻賺錢嘅黃金機會。

精選娛聞，喺晒《娛果》 http://fb.com/appledailyent