嚟緊禮拜日會同好姊妹黃智雯、姚子羚、胡蓓蔚等，參加渣馬十公里嘅胡定欣，今日去到新城接受薛家燕新時段節目《開心大派對》錄音訪問，佢跟家燕姐細說入行經歷，同埋佢哋幾個姊妹組成嘅「胡說八道會」趣事。

講到佢哋「胡說八道會」之前諗住舉行音樂會，定欣話：「頭先乘機叫阿Bob（林盛斌）投資落我哋個度，有咁好班底，家燕姐同阿Bob都話每人包五百張飛，其實我哋都有構思去做，要趕喺杏兒生仔之前要做。」

由於佢哋各自都有工作在身，最快都要今年下半年先做到，講到咪要叫杏兒忍住唔好做人先？定欣笑住話：「要同佢講等完騷先，佢哋個BB要等騷期完先生得，所以傾嘅時候已經好開心。」而今個禮拜日嘅10公里賽事，佢哋幾姊妹想一齊衝線，定欣話特別提醒比較少練跑嘅智雯，賽事係有時限，唔好到時要坐大會巴士返終點。