黃貫中、夏韶聲、單立文（豹哥）、鄧建明（Joey）同恭碩良五位band壇強人噚晚喺紅館舉行首場「搖滾大俠奏」band騷，周日(10號)係黃家駒嘅56歲冥壽，阿Paul同豹哥分別有喺台上同家駒講生日快樂，阿Paul唱完《灰色軌跡》之後，佢話：「好朋友生日快樂，我哋唔會忘記你，一切在心中。」

跟住豹哥亦都話：「93年家駒離開咗，喺跟住嗰年我聽b記啲歌，唔知點解都會喊！」之後豹哥一度痛哭流淚，阿Paul就話：「我哋總會有相見嘅一日，佢嘅音樂係會流傳。」豹哥就叫全場同家駒講happy birthday，場面感人。

入行年資最淺嘅恭碩良，佢向台上4個band友致敬，講到豹哥嘅時候，雖然豹哥已經話自己有好多黑歷史，不過恭碩良懶理繼續話：「我喺澳門長大，嗰陣嘅資訊冇依家咁發達，有啲戲院播特別電影，我要儲錢先可以去睇。點知30年後，喺街撞到個人熟口熟面，於是乎咪問佢係咪拍乜乜蒲！」豹哥搞笑話：「係《喜愛夜蒲》，嗰陣我創立床上武術指導，自從我從影之後，創造呢個職位，大家應該要多謝我！」

之後豹哥又代fans問問題，佢搞爛gag問恭碩良：「鍾意農曆年抑或林憶蓮。」恭碩良即刻話：「我鍾意農曆年同林憶蓮一齊過！」結果全場拍掌！

噚晚搵咗葉世榮同豹嫂胡蓓蔚做表演嘉賓，世榮話好耐冇喺香港，好掛住大家。著住透視長裙嘅豹嫂同老公合唱《下雨天》，好憎聽到自己唱歌把聲嘅豹哥就話：「同老婆合唱，係人生苦難幾分鐘，不過緣份奇妙，我呢啲人都有人愛，真係奇蹟！」

精選娛聞，喺晒《娛果》
http://fb.com/appledailyent