范振鋒同太太李思欣、黃榕、筱靖、仙樂都等今日喺九龍塘出席「皇國薈」成立派對，黃榕就透露書展會推出寫真集，最近都忙於拍攝，影相地點包括南生圍、大帽山等，佢話：「影咗五日，完成咗一半，啲衫都係若隱若現，遲啲會影全裸，今年呢本寫真集嘅意識都大膽，影嘅時候，攝影師叫我挑逗佢，反而我覺得好難，因為佢話我畀唔足戲，又叫我擘大對腳，話我唔夠性感。」

面對攝影師嘅要求，怕唔怕尷尬？佢話：「有，我流晒汗，震晒，因為我未試過咁激。」擁有32C、23、33嘅佢會唔會喺沙灘影全裸﹖佢表示：「私人泳池，計劃喺水底影。」

此外，筱靖離開亞視後，投資咗六至七位數字去代理咖啡品牌，目標係開舖。講到有傳亞視出糧有問題，筱靖話：「都唔係第一日嘅事，十一月同十二月都未出畀我，欠我四至五位數字，依家交畀勞工處。」