爛牛+午夜情=劉美君

18歲結婚，生埋仔先入行做歌手，第一首歌《午夜情》講舞小姐，當年女歌手都鬥做玉女，劉美君卻破格着爛牛影唱片封套，6、70後諗起爛牛就諗起劉美君。

「形像設計話整條爛牛，佢買條褲洗到爛，佢剪嘅，我覺得好嘢喎，咁正嘅。因為條褲係男裝，坐喺度褲頭會谷起，佢走埋嚟幫我解咗粒鈕。」劉美君唔覺得自己性感，偏偏就做咗佢嘅標籤：「我係好男仔性格，出道時好多人話我好性感、好媚態，我覺得呢啲字眼好怪。我識得好多男仔，最早嗰時佢哋講：『你估真係鍾意你唱歌，喺地鐵見到你張海報，買完唱片先鍾意你唱歌。』」

9年冇開騷嘅劉美君，將於10月14及15日假紅館舉行《千色演唱會》，心情好興奮：「有十個時代背景，穿插現代、古裝都有。呢個騷唔係易做，唔係識唱啲歌，有啲靚衫，排吓跳舞就ok，成件事連轉妝造型，要有一番設計，全部嘢我唔會離開台，觀眾唔會只係坐喺度睇我換衫化妝咁簡單。呢個好創新，冇人咁做過演唱會，如果話冇壓力係呃你，不過我份人好得意，越難做越興奮，你叫我淨係做演唱會都覺得悶，就算喺紅館放煙花都係表面嘢，我希望係用腦去諗創意，唔係用錢做嘅嘢，希望20年後睇返轉頭，我哋做過呢樣新嘢，不枉顛得咁辛苦。」

劉美君嘅歌一直好踩界，偏向風情、性愛，係咪想幫某啲人發聲？佢坦言：「我由細到大唔鍾意同人做埋一樣嘢，細個老師叫畫花，我鍾意畫草。當時女歌手出嚟，梗係唱白雪公主愛情故事離唔開初戀，我都結咗婚，初乜戀啫，囝都有個，我唔care係咪做少女，只係care有冇將實質社會存在嘅嘢擺喺題材上，即係唔好咁虛假啦，邊有人一世做公主？點解你哋只係唱白雪公主，冇人唱下舞小姐、情婦，佢哋都係人。」

結過兩次婚嘅劉美君，同現任男友拍拖8年：「最開心頭兩年，我係一個永遠要有戀愛感覺嘅人，因為我保持到溫度，但佢唔得，變咗我有唔開心，大家要搵平衡，我成日同佢講，我已經52歲，如果你招呼唔到我呢個小要求，惟有大家唔一齊，每年都諗一次㗎。」咁劉美君會拍拖拍到幾時？佢笑笑話：「一世都拍拖，我結過兩次婚，好明顯地唔會再結婚...都係唔好保證，因為我係冇乜planning嘅人，哈哈，或者一個唔覺意覺得結多次都好玩，但呢分鐘問我，我冇諗過結婚，我唔係要安穩，我要戀愛感覺，想要人錫我。」

採訪：余燕儀、懷鈺
攝影：沈健程
攝錄：馮峰、NEO
髮型：Gary Sun@Hair Corner
化妝：Kris Wong
服裝：Etro

【我們的演唱會1】72歲葉振棠潮玩電動車航拍 盼搬上紅館舞台
http://bit.ly/2wJxhIp

【我們的演唱會2】江若琳露腰開騷 許志安救一命？
http://bit.ly/2gmzKOA
【想生4個咁多】江若琳：遇到幾個人渣唔使驚 嫁硬「生煎包王子」
http://bit.ly/2gmFBmQ