龍發唔易炒起
有個做包銷行嘅行家同伏勝講,今次隻股喺淡市中圍得晒飛已經好好彩,由於隻股喺上市嘅時候,有九成股份係配售畀啲「獨立第三者」,呢批人聽講都係望喺上市日贏兩成就走人,但隻股仔喺上升後最多都係做過三毫八,同預期差一大截,其中有幾個批咗股嘅客同啲經紀講,話如果隻股再唔郁就要沽股「骨水」,如果係真嘅,隻股真係好難有睇頭。
電盈(008)喺上星期四公布半年業績,自從隻股跌穿咗兩蚊之後,已經唔多人理會呢隻股,業績公布又輸咗成7億幾,有人估隻股好快就會成為毫字股。但上星期五早段,隻股不跌反升,有炒家即刻話要睇實,皆因出邊傳緊隻股會合股,如果要合股嘅話,就一定會先炒番起佢,據講所定嘅目標價更直指1.60元。但睇番隻股星期五個勢重未有鑊氣,炒唔炒得起真係要睇吓佢哋嘅功力。
伏勝