吳千語、何超儀、2R嘅黃婉君（Rosanne）、方中信同林德信等，今日喺尖沙嘴出席慈善相展，其中有張林峯瞓喺梳化嘅相，偏偏當事人林峯就冇到場，大會反而邀請咗佢位「七愛」千語BB撐場。

呢排千語BB單係靠同男友林峯拍拖嘅新聞，已經勁出活動賺逾百萬，咁有新聞價值，今日廣告商都唔會放過呢個機會啦，司儀楊洛婷問千語BB覺得點樣先稱得上型男，台上就放正張林峯Chok住瞓覺相，BB話：「 型嗰種氣質，靚同型係由心開始。 」附近都有著背心嘅任賢齊滴汗相，千語BB就大讚：「好wet，好性感。」楊洛婷問係咪性感過林峯，千語BB抵死話：「佢瞓緊覺喎。」

咁千語BB對呢張相點睇先?佢就話： 「佢似諗緊開心嘢。」唔通諗緊佢？千語BB就嬌嗔話：「唔知呀。」 林峯舊愛陳嘉桓日前暗寸千語BB擁有唔少名牌服飾，似係揶揄佢虛榮，千語BB就反駁：「 唔覺，我都有冇牌子嘅衫，我冇話一定要買有牌子，靚就得。 」




逢周五隨《蘋果日報》附送嘅時尚美容雜誌《add》第二期雖然早已派完；拎唔到書嘅朋友，可以上番《add》嘅官網 http://hk.add.nextmedia.com/睇番足本網上版，除咗有陳慧琳專訪，仲有好多時裝靚嘢睇！