曼聯球星保羅普巴日前結束訪港之旅，話咁快呢位法國中場已經身在地球另一邊，去咗南美洲哥倫比亞繼續佢嘅宣傳活動，到埗後見普巴攬住個枕頭，上面仲有佢個人商標「PP」，唔通諗住出普巴枕頭？

普巴冇話會將枕頭商品化，不過都有喺佢自己社交網站度介紹下：「你哋不妨叫佢做Pogpillow（普巴枕頭）。」如果真係推出的話相信會有唔少普粉同魔粉捧場，可以諗諗佢。

普巴坐私人飛機喺周五到達哥倫比亞，到達之後仲同曾經喺祖雲達斯做過隊友，哥倫比亞國腳古達度見面。