證監會近年雷厲風行號稱專打大鱷，私有化、收購合併俾佢「將軍」搞煱時而有之，但世事真係何曾是絕對！中國燃氣（384）想縮沙唔用21.17億，買起中裕燃氣（8070）單嘢，中燃因為縮沙理由唔夠充份，俾證監落order要佢「必須繼續進行」收購！呢單嘢搞成咁，竟然係由中裕幾個可能係全宇宙最強嘅打工仔引發！
中燃收購中裕，好自然要中裕交晒啲數簿，俾中燃做盡職審查，但有三個中裕旗下中國附屬公司嘅高級管理層唔滿意呢單刁，向中裕大老闆王文亮攞着數，王老闆得到中燃老總劉明輝嘅默許，派咗特別花紅同埋送咗新車俾佢哋。

證監迫中燃繼續收購

點知呢班職員仲未夠喉，想再拎多啲，仲要求中裕現時嘅管理架構唔准郁，王老闆呢勻唔制，呢班管理層就嚟一招「收佢數簿」，唔幫核數師完成核數工作，核數師提出嘅問題，佢哋又唔肯答，核數師又攞唔到燃氣錶讀數嘅資料，總之核數工作停晒，令到準新主人中燃知難而退。
點解證監仲要中燃去馬呢？簡單啲講，依家唔可以肯定中裕因核數問題而出唔到業績，令中裕嘅上市地位受威脅，只係可能遲啲。證監又覺得中燃只假設中裕大老闆未能履行責任，所以要中燃繼續去馬，到deadline中裕交唔到數出嚟先講喇。呢個故事教訓大家，「刁」唔好亂做。

李華華
mailto:[email protected]