星期二舉行嘅德甲聯賽，奧格斯堡憑住基哥列舒治開賽4分鐘就入波，主場以1:0小勝RB萊比錫。不過，奧格斯堡隊長丹尼爾拜亞喺下半場就向住RB萊比錫教練夏辛侯迪做不雅動作就引起咗爭議。

比賽仲剩番大約15分鐘嘅候，同對方球員一齊追緊波嘅奧格斯堡中場丹尼爾拜亞跌低咗，當時位置係比較接近萊比錫嘅技術區域，當拜亞起身嗰陣，竟然就對住夏辛侯迪做手淫嘅動作，比賽完成之後，拜亞雖然想同夏辛侯迪握手但就畀對方拒絕。

拜亞事後為自己辯護「呢場係90分鐘嘅惡鬥，你會因為情緒激動而做一啲嘢，佢喺邊線之外而我喺球場。」拜亞又話︰「咁就係足球，會有激情喺度。佢唔應該成日都因為一啲判罰而作出評論，我哋係有球證嘅。賽後呢啲嘢通常都唔會記住，但佢唔想同我握手。」唔肯同拜亞握手嘅夏辛侯迪，認為對方根本唔係真心道歉，佢仲話︰「我唔使講任何嘢，如果第四球證睇到丹尼爾拜亞對我做乜嘢手勢，應該已經即刻將佢趕咗出場。」

雖然拜亞嘅不雅手勢逃過咗球證法眼，但德國足總有可能會就事件進行調查，拜亞隨時會有手尾。