車路士領隊干地又被爆出因為轉會嘅分歧，同球隊管理層再次起衝突。事緣係干地希望一月冬季轉會窗時買人補強，佢同管理層提出兩個選擇，一係就畀我想買嘅人；一係就預左過一個失敗嘅賽季。

喺對白禮頓嘅賽前記者會，干地被記者問及買人嘅事，佢表示唔想喺公開場合談論呢件事，但佢會向球隊反映自己想要啲咩人，不過話事權係球會手上。有傳夏天干地已經因為收購盧卡古嘅事，同管理層有過衝突，最終車仔只係簽入次選嘅艾華路莫拉達，已經令干地好不滿。而今次干地希望一月份補強，畀佢嚟緊應付四條戰線，同對巴塞嘅歐聯大戰，傳聞話效力利華古遜嘅20歲牙買加前鋒里安拜尼係佢頭號目標。

----------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM