剛啱（12日）日馬第九場「魅力知友」同「美麗寶寶」平頭冠軍，表面係皆大歡喜賽果，事實並唔係所有馬迷都係咁諗，賽後有唔少馬迷質疑影相結果，認為終點相顯示「美麗寶寶」影輸，更有人懷疑馬會特登唔放大啲張相，有心博大霧。

經常都有馬迷質疑影相結果，多少因為馬迷唔多明影相嘅電眼運作。平心而論，馬會只係抽水嘅莊家，邊隻馬影贏或者平頭，馬會冇任何得益或損失，根本無需要喺影相結果出蠱惑。既然馬迷對影相結果有懷疑，馬會都應該考慮，喺今晚（15日）夜馬期間，再放張大啲清楚啲嘅終點相上大屏幕，畀馬迷睇真結果冇花冇假。

除咗影相分勝負，其實呢場馬更大嘅爭議，係郭能騎「南京之友」於早段刻意干擾羅理雅隻「蒙古王」，競賽小組竟然只係罰佢停賽兩日。喺巡邏影片睇到，郭能係望完內欄後特登移入去食「蒙古王」條跑線，炒飯哥冇畀佢撞到落樓都算好彩，郭能呢個動作絕對唔係不小心策騎，係嚴重得多嘅危險策騎，隨時搞出連環墮馬意外。

競賽小組賽後話郭能策騎紀錄良好，所以輕判佢停賽兩日，小組做嘢就係咁公式化，策騎紀錄好，唔代表可以輕視危險策騎行為，罰咁輕更加有鼓勵騎師日後放膽再犯之嫌。記得炒飯哥同史卓豐今季先後因為危險策騎，分別停賽六日同八日，郭能只係罰兩日，小組唔係放過郭能就係錯判。

阿Joe