中資股小震盪，要避險又要有唔錯爆炸力，扶農或者環保股係唔錯選擇，再由上而下揀股，國中（202）就抵到爆。家陣場內環保水務股，P/B起碼講緊三、四倍。呢個情況，唔係魚缸獨有。今年上半年，法國跨國巨頭威立雅，都係以溢價兩、三倍收購內地項目。祖國處理污水同解決食水問題，係當前大務，水務企業睇高一線，國中最新NAV0.115元，現價（0.146元）P/B只得1.2倍，相對同類股，平咗一大截。
再講，國中除咗手頭項目，有祖國嘅證券報話，國中已經同黑龍江齊齊哈爾市及鶴崗市洽談，提供綜合水務服務。消息雖則未公佈兼落實，但照咁睇，國中有意大做兼壯大業務。買股識於微時，等到國中水務業成形，分分鐘唔係咁嘅P/B。國中股價係咁易翻半番到0.22元，P/B都未去到兩倍。

松景隨時翻一番

松景科技（8013）公佈08年首季度（9月底止）業績，純利上到574萬港銀，增長43%。集團主打XFX顯示卡產品，繼續成為市場熱愛。已經講過，喺新一輪PC玩機潮下，加埋亞洲區網上遊戲爆炸性增長，松景一定肥仔水。松景08年度純利維持第一季度增長，去到貼近5000萬銀，PE都係講緊6倍。除非有大戶刻意壓價，否則，現價（0.47元）翻一番到0.94元，PE都係12倍，一啲都唔過份。