噚日《中國經濟周刊》一篇報道，內容居然係國家外滙管理局抦社會科學院嘅專家計錯數。呢個指控可大可小呀。要知道社科院來頭唔簡單，1977年成立，前身係中國科學院哲學社會科學部，家陣係中國哲學社科學研究嘅最高學術機構。
話說社科院世界政治與經濟研究所專家張明，上個月發表咗份報告，指流入中國嘅熱錢規模達到1.75萬億美金，相當於今年3月底中國外滙儲備存量嘅1.04倍。報告一出，即刻引起廣泛議論。《中國經濟周刊》記者王紅茹喺最新一期報道中，聲稱訪問咗外管局相關部門負責人，嗰位負責人列舉咗四點推翻張明份報告。
其中比較重要嗰兩點分別係，嗰位負責人話，張明連啲熱錢喺中國賺嘅利潤都計埋落熱錢本身度，擺明誇大咗數字。仲有，張明份報告由03年開始計有幾多熱錢入咗大陸，但中國經濟真係熱起來，係05、06年股市、樓市起動時期，要知道除非有利可圖，否則邊有熱錢入嚟，所以一般統計都係以05年開始，張明即係計多兩年啦。

聲明澄清非外管局觀點

不過，華華就覺得有啲奇怪，篇報道雖然冇開名，但話晒係引述自外管局相關部門嘅負責人，但外管局近個多月嚟不斷出招打擊熱錢，又查三資企業，又考慮通過對境內銀行嘅非居民人民幣賬戶加強統計監測，仲要求銀行加緊上報境外尤其係港人存款數據同情況。
先係打擊，𠵱家又話熱錢流入情況唔係想像中驚人，似有啲唔啱嘴形。正當華華百思不得其解時候，外管局發聲明，話《中國經濟周刊》王紅茹嘅報道，觀點並唔代表外管局。聲明仲重申，外管局對跨資金流動監管高度重視。咁就真係要問吓王紅茹訪問嗰位係乜水嘞！

電郵：mailto:[email protected]