美國影星班亞弗力（Ben Affleck）昨日上咗美國名嘴Jimmy Kimmel清談節目受訪，老友Jimmy指出班佬弟弟卡斯亞弗力（Casey Affleck）喺金球獎拎影帝時，完全冇多謝大佬，為班佬抱不平。班佬就話：「係啦，我都有啲驚訝，佢提咗咁多人，都唔提我。我當年拎奧斯卡都有多謝佢。」Jimmy就搵番當年憑《驕陽似我》（Good Will Hunting）拎金像最佳原創劇本時，班佬喺台上多謝細佬嘅片段。

嬲嬲豬嘅班亞弗力趁機會爆細佬黑材料，話卡斯10歲至14歲都冇擦牙，去廁所用尿兜時會除低成條褲，好怕蝴蝶，同曾經問佢「《回到未來》係咪真人真事？」。不過其實班亞弗力同細佬係好好感情，班佬話好以細佬為榮。