韓劇《太陽的後裔》男星宋仲基今日現身上海，出席佢跟章子怡合作代言嘅品牌活動。今次係大陸傳出「限韓令」後，oppa首次去大陸工作，不過似乎無損oppa喺大陸嘅高人氣。

而活動正式開始前，唔少大陸傳媒都一早去到會場做準備，有唔少媒體仲打算做直播，等去唔到現場嘅粉絲可以喺網上睇到宋仲基，點知喺活動開始前就見到唔少工作人員詢問在場記者係邊間媒體，有啲冇拎到許可嘅就唔畀做直播，亦都唔可以近距離接觸一眾嘉賓，唔知係唔係怕現場記者會詢問有關「限韓令」問題，當中有人仲喺微博留言話：「因為限韓令的關係，本來有的零距離，直播oppa宋仲基的互動只能被取消，不過安排到內場前兩排，一會給大家直播。」

雖然活動於6時開始，不過宋仲基同章子怡當然未有咁早現身，最終騷擾多時，宋仲基同章子怡終於喺晚上差唔多到9點先現身，雖然唔少粉絲都留言鬧爆主辦方指大會安排不善，直播又睇唔到，但當佢哋見到oppa出場，自然氣都消晒。而今次係章子怡去年底生B女，首度離開愛女，只見佢風采依然，依然弗到爆。

另外，宋仲基今早由韓國仁川機場出發時，佢戴上鴨舌帽現身，當時由側面望，唔少粉絲都估計oppa已為拍攝新片而剃頭。不過當oppa於晚上現身上海活動時，冇戴帽嘅佢就以濃密黑髮示人，唔少粉絲即大表驚訝，認為oppa個瀏海唔多自然，更有人猜測oppa係戴假髮保密新髮型，為咗新片，真係要咁神秘？