學跳舞雞手鴨腳還算OK
馮仁昭四圍超:張燊悅勝在骨夠軟

蘋果日報 2002/06/17 00:00


張燊悅(Nicola)早排專程去咗尖沙嘴嘅一間跳舞學校,跟老師學跳舞,嗰日Nicola先上第二堂,所以都有啲雞手鴨腳。

猛呻吃力
其實今次Nicola所學嘅只係一啲舞蹈嘅基本功,老師重教佢好多拉筋嘅動作,等佢嘅筋骨可以柔軟啲。結果Nicola練咗成個鐘,跳到大汗叠細汗,不過老師就讚佢嘅筋骨算軟,啲舞姿都算OK喎。
Nicola練完舞之後話:「我喺細個嗰陣時都有學過吓跳舞,但我學嘅同今次老師教嘅好唔同。老師教嘅舞似啲黑人跳嘅hiphop,我自己係從來冇接觸過,所以頭先都覺得幾吃力,咪一路望住塊鏡,留意老師點跳,自己喺隔籬又跟住跳囉。」不過,Nicola話跳完舞之後都覺得好攰,睇怕第二朝佢起身都有排痛。

王賢誌賣二手衫籌31萬
王賢誌早排舉行過「名人二手衫慈善熱賣Take2」,日前佢將籌得嘅三十一萬幾善款嘅支票,正式交畀東華三院。王賢誌話明星二手衫最好賣嘅當數Twins同陳慧珊嘅衫,不過王賢誌覺得有啲對吳君如唔住,事關君如有個ChristianDior手袋喺外面二手店賣二千幾蚊,但係王賢誌就定價幾百蚊,佢話擔心君如唔鍾意佢將價錢定得咁低喎。
魏駿傑傷腰變肥仔
魏駿傑近排肥咗好多,馮仁昭好奇問吓佢點解忽然間大咗成個碼。點知傑仔苦口苦面咁話佢早排整傷腰骨,唔可以做運動,先至愈嚟愈肥。𠵱家佢腰骨好番啲,已經開始減肥,由一百八十磅減到一百六十幾磅,成績都算唔錯呀。

Twins產品炒價高
英皇人氣雙妹嘜Twins早排咪有袋、筆同埋運動衫嘅相關產品推出嘅,呢兩位妹妹仔嘅吸引力真係有番咁上下,聽聞佢哋嘅產品已經差唔多賣斷市,因為Twins嘅fans好豪氣,買親嘢都幾乎係將所有產品掃清。因為佢哋諗住儲埋成套,留番第日攞嚟炒,其實𠵱家有啲fans都已經開始炒啲賣斷市嘅產品,炒價重係原價嘅一倍㖭。

老爹三個男人一個墟
台灣歌手迪克牛仔嘅老爹今晚喺灣仔伊館舉行一連兩場個唱,佢重請咗鄭中基同鄧建明做表演嘉賓。佢哋三個日前綵排,由於佢哋都鍾意夾band彈結他,所以好投契。不過由於佢哋夾band嘅聲浪太大,又雞啄唔斷咁討論創作心得,俾工作人員笑佢哋重嘈過「三個女人一個墟」。
發哥波癮大冷落嬌妻
前晚馮仁昭收到喺加拿大嘅發嫂電話,佢話前日發哥唔使開工,掛住睇世界盃英格蘭對丹麥嗰場波,唔得閒陪佢,所以佢諗住打畀馮仁昭傾吓偈。發嫂話呢排發哥日日追住睇世界盃,有時搞到開工都冇精神。發嫂勸過老公第日要開工就唔好睇啦,點知發哥靜靜雞自己早啲起身睇波。

華仔《頭文字D》計劃擱置
林建岳呢輪同劉德華行得好埋,好似有好多合作大計,不過林建岳早排話會幫寰亞搵華仔拍《頭文字D》,但寰亞計過條數,覺得部戲最少都要投資三千萬元以上,以目前咁嘅市道,始終覺得太冒險,所以建議老闆暫時先擱置呢部戲。不過市道低迷,華仔重企硬收七百多萬片酬,唔係咁多公司畀得起!

郭富城幫蔡永昌創業
自從蔡永昌離開嘉禾之後,佢就一直冇再搞電影製作。但最近蔡永昌蠢蠢欲動,想喺影壇再大展拳腳,因佢搵到新資金返嚟,所以呢排四出同以前合作過嘅導演或製作人聯絡,聽聞創業作想開一部古裝片,想搵郭富城做男主角。