港股延續升勢，兼升得更「亮麗」，有幾亮麗？正如周星馳喺電影裏面咁講：「各位觀眾，4條煙」。華華講嘅係恒指噚日升咗1111點，啱啱好4條1。
睇番今年嘅恒指走勢，華華發現出現過唔少「奇」數，分別係兩次「3條1」同「3條7」，不過呢3個「奇」數對股民嚟講，都唔係好嘢，拖累港股下挫。喺舊年3月29號同今年5月15號，恒指不約而同都係跌111點，而今年3月5號就更跌成777點。雖然呢3次跌市嘅翌日，港股都升番，但唔係次次都可以收復失地，好似3月5號跌777點嗰次，翌日只係升番唔夠400點，跟住嗰日又跌過。至於今次港股升1111點，究竟翌日係延續升勢，抑或企硬，甚至腳軟，就要今日開估。

地產股　超人最執輸

恒指噚日能夠出現4條1，全靠香港地產股撐起，本地薑終於攞番個彩，唔使吓吓俾H股牽住鼻走。當中以郭氏三兄弟嘅新地（016）最威，股價創歷史新高，勁升8蚊，報160.1蚊，錄得5.3%嘅增幅。不過數到升幅最勁嘅地產股，就係黃志祥嘅信置（083），股價升11%，其次就係陳啓宗嘅恒隆地產（101），升7.7%。股神李兆基嘅恒地（012）亦都唔失禮，股價晏晝最高曾急升8.9%，後尾升幅收窄，報68.45蚊，升6.8%；至於超人李嘉誠嘅長實（001）就執輸啲，股價只升2.9%。

網友解碼

對於恒指噚日升1111點呢個奇景，若然真係如星爺手上嗰四條煙，梗係好啦，喺《香港討論區》更有網友話，四條煙係恒指向香港股神四叔致敬。不過亦有網友擔心，「1111」好似四炷香，咁呢個奇景究竟係吉兆定凶兆？
michristian對1111嘅新睇法係：「恒指＋1111點，代表支持香港股神四叔？定支持賭王嘅4萬點？」四叔嘅粉絲Ray-Yeung答話：「四叔，4條煙，4萬點。」
joshfun就覺得，「好事成雙，帛事開單。」超級淡友God_of_fear用達文西解碼嚟睇，話係大戶暗號：「1月1日fallto11111？」不過disgust.com.hk好心水清，指「1月1日點會有市？」nicky118不忘1111.3個小數位，佢話：「暗號由右邊睇㗎，升到31111。」最清醒係rayan729，「係人都get到就唔係暗號。股市靠分析，唔係靠迷信。」
mailto:[email protected]