正當大家見到普巴跳舞跳得咁開心，以為呢位24歲法國中場受傷都好似都唔太嚴重之際，摩佬就咁講：「我們仍未知道普巴會是受傷12周還是12日，所以我們要多等一周，才有掃瞄的結果知道受傷的情況。」

家陣就真係有結果啦，摩佬喺對水晶宮賽前記者會話：「我不會談及長時間受傷的球員，好像保羅普巴及馬高斯盧祖，我不會去想他們可以很快復出 。」

仲有報道話普巴可能要抖到11月中，而曼市另一邊嘅阿古路都傷埋。呢位29歲阿根廷國腳周四晚在荷蘭炒車肋骨骨折，哥帥都未肯定到佢會傷幾耐：「對車路士的比賽他不能上陣，國際賽期也不能為阿根廷上陣
，我們的感覺是他肋骨骨折，但我現在仍不知道他會缺陣多少天。」

雖然曼市雙雄都有主力受傷，之不過佢地近況都唔錯，紅魔就算冇咗普巴中場都仲有安達靴里拉同費蘭尼輪換。而藍月亮都仲有耶穌喺度，呢位20歲嘅巴西國腳，喺各項賽事入咗五球Fit到爆。

而紅魔周六就會主場對水晶宮，藍月亮就會作客車仔，又睇下佢地踢成點!