當年今日
關於我們

【吃黃連的啞仔】教你過關賺回扣(孫柏文)

蘋果日報 2015/04/16 06:00


嗰日坐喺廂房騎樓食雪茄,全季坐喺附近食雪茄嘅任性遴選會員突然走埋來問:「孫柏文,你有冇朋友賭外圍馬呀?」我答:「冇喎。點解呀?」任遴選就坐喺我旁邊繼續話:「聽講華南地區好勁。」
佢繼續話:「我都唔知點解仲會有人幫襯外圍!」聽任遴選講,你如果今時今日買過關時仲幫襯外圍,確是真白癡。點解?原來假設你買100蚊三串一獨贏,三關都係10倍,頭兩關順利勝出,不過最後嗰關輸咗。如果幫親外圍會點?冇得賠。
如果喺同一情況係幫襯馬會呢?任遴選就係咁問我。我就話:「你買落去嗰注得100蚊,張飛撕得啦!」哈!原來因為過到落第三關時,落第三關嗰注係一萬元,所以有得攞番回扣一千。即你嗰張一百蚊飛,可以收一千!我都唔知。當我同任遴選話唔知時,佢就大聲話:「係囉!真係問十個,起碼有七個話唔知!連你都唔知,死未?不過冇辦法,根據啲博彩條例,馬會唔可以宣傳呢樣嘢。」
咁我聽到,就點點頭答:「哈!宣傳呢樣嘢,唔使吓吓叫marketing啲人開會做㗎。學英國人年代咁,可以好含蓄咁做。唔可以搵推廣部,就叫啲會員馬迷自己來囉。下次,有啲超大額過關,即嗰啲過百倍連贏,上場一過磅打到落去得番兩倍嗰隻。跟住仲要輸埋之後,傍述員跟住大大聲幫嗰個之前大額過關嘅馬迷計,好公開咁講埋佢可以攞番幾多。咁咪一傳十,十傳百咁傳開囉!」搞掂!咁就打倒啲外圍佬!
始終,收外圍嘅人,利潤豐厚,最終為保護自己營運,會有大量誘因去收買執法機關。唔全方位打擊,最終連同跑馬無關嘅市民都會受害。唔信?問吓1975年前嘅香港人啦。