立法會黑哨主席曾鈺成噚日按劇本剪布，剪布之前，建制派諗住攞番個尾彩，群起舉手發言抽泛民水。但抽水都有高手低手分嘅，好似政壇元秋蔣麗芸咁，以為聲大就有貨賣，點知連黑哨都睇唔過眼，唔賣佢賬，先後幾次黑面指正元秋離題。元秋不甘受辱，反咬話自己個創黨主席蝦佢，最尾笠水收聲。

噚日拉布拉到去講街道清潔開支，元秋一嚟就牛頭唔搭馬嘴，想學人講全民退保，佢先將2030年講成2003年，之後仲越講越high，曾鈺成都忍唔住出手截佢，表明議員只能圍繞修訂發言，仲毫不客氣咁話「2003年係10年前呀，蔣小姐」。
𤓓爆嘅元秋心中有氣，駁嘴話：「雖然我哋係同黨，但你蝦得過就蝦，既然你咁蝦我，我都冇嘢講」。
被曾鈺成踩到上心口嘅元秋，心有不甘，佢趁住其他議員發言時再度發難，向黑哨曾投訴梁家傑等議員都離題，問主席係咪唔公平？曾鈺成開始按捺不住話：「請你容許我判斷。」意猶未盡嘅元秋篤完又篤，仲賴自己係新議員，終於激到黑哨曾發火，話「蔣麗芸議員你唔能夠坐喺個位上面講嘢，請你立即停止發言﹗」仲叫元秋虛心啲聽下其他議員講乜先，反正市民都會自行判斷。曾鈺成呢鋪真係動真火，元秋即時收口，唔敢再喺度指手劃腳。

mailto:[email protected]