「香港文匯報創刊70週年酒會」今晚喺灣仔會展舉行，出席包括劉嘉玲、邱淑貞、曾志偉、容祖兒、陳展鵬、梁烈唯、蘇麗珊、薛家燕、應屆港姐冠亞季軍、菊梓喬、衛詩雅、林穎彤及湯怡等。

梁烈唯噚日喺微博發聲明，同一個製作人劃清界線，梁烈唯解釋：「上次幫我呢個人做嘢，已經收唔到錢，追咗佢一輪都收唔到，知道佢有對好細嘅小朋友，可能佢經濟上面有困難，我就叫公司唔好再追佢。最近佢有微信搵我，話想搵我做嘢，我話舊數未清唔得，佢話不如用另一間公司名義搵我做嘢，我話唔可以咁樣呃我公司，之後佢又用我同Bob同馬德鐘嘅對話cap圖，話我哋會出席一個party，跟住收八百蚊馬幣入場費，我哋唔想再有人被佢呃，所以出嚟講清楚，同時我都刪除晒佢嘅聯絡，佢還唔還錢都唔重要，我今次真係好嬲。」

陳展鵬日前被發現同女友單文柔去倫敦sweet旅行，佢話此行去咗成個禮拜，展鵬話：「被人影唔介意，只係自己一向低調。」對於感情是否邁進一大步，佢話：「o依家唔錯， 呢幾年出現問題，佢都喺我身邊，希望先苦後甜。」講到胡定欣ig unfriend咗展鵬 ，展鵬話：「其實係半年前嘅事，因為好多傳媒對我都好敏感，而透過我嘅ig，會搵到好多我朋友嘅相，唔想佢哋被cap圖，所以大部分嘅女藝人同朋友我都刪除咗。」對於定欣有傳唔續約無綫，展鵬話：「希望百花齊放，如果真係離開tvb
都可以返去拍吓劇。」

精選娛聞，喺晒《娛果》
http://fb.com/appledailyent