女飛魚歐鎧淳今日接受《公子會》訪問，佢話呢排日日忙於練習：「嚟緊九月會有三個比賽，仲有一個大型嘅比賽就係出年嘅亞運。」

歐鎧淳嚟緊書展會出書，到時要現身宣傳同出席簽名會，問到書入面會唔會有泳照？佢話：「反而本書係多字少相喎，可能有張我9歲時嘅泳衣相。」佢又透露寫呢本書時，時間好緊迫：「我由農曆新年開始寫到5月起貨，真係寫咗好多字，所以奉勸大家想真係認識我先好買。」

問到書內會否提感情事？佢話：「都會有兩三個Chapter係講感情同家人朋友。」咁男友胡子彤又佔幾多篇幅？佢話：「你又知一定寫佢？你哋到時睇下咪知囉，其實寫嘅時候佢都知嘅，但就冇問過我會寫佢幾多。」