聯儲局主席伯南克明年一月唔撈，邊位接佢班成為近期市場熱話，聽聞被視為熱門之一嘅前財長薩默斯，近日積極與奧巴馬相熟嘅華爾街人表明心迹，又搵喺人選上有話事權嘅美國參議員傾偈，似乎好恨做咁喎。

履歷靚過耶倫

論資排輩，薩默斯個人履歷真係靚絕，本身唔單止係著名經濟學家，阿叔薩繆爾森同舅父阿羅都係諾貝爾經濟學獎得主，加上佢本人喺美國政經界經驗豐富，克林頓時代做過財長，奧巴馬上任後亦即刻搵佢做國家經濟委員會主席，超晒班，另一位熱門接班人、聯儲局副主席耶倫相對輸蝕。
佢老哥最唔好嘅地方，就係一向恃材傲物，經常口不擇言得罪人，好似2005年喺哈佛大學做校長時，就衰多口話女人搞科研同工程唔及男人，惹起平權人士聲討而被逼翌年下台。
專同奧巴馬唱對台嘅共和黨又可能揀耶倫，就算奧巴馬支持佢，薩默斯最終能否如願，仲要睇佢冧唔冧掂國會班大帝。