金融海嘯之下，噚日再有一家公司逆境中成功上市，就係人和商業（1387）。好多人都知，新世界（017）旗下嘅新世界策略係人和第二大股東，所以噚日新世界發展執董鄭志剛都有出席掛牌儀式，唔知係咪因為咁，隻股走勢一開始都唔錯，大跌市中股價一度逆流而上；不過第二大股東代表（即係鄭志剛囉）一走，股價就腳軟，臨收市先再發力，最後高招股價4.4%。

有經紀同華華講，雖然人和公開招股時只有672人認購，又喺跌市日上市，但都冇話跌穿招股價，真係要多謝彤叔乖孫鄭志剛。噚日乖孫鄭仲當場唱好人和㖭。
作為人和聯席全球協調人嘅中銀國際董事總經理凌瀚燊，就梗係唔認同口痕經紀嘅講法啦，佢話新世界做股東對上市係有幫助，但最重要都係人和本身嘅業務夠「堅實」，而且好多機構投資者支持，雖然散戶出現公開認購不足情況，但只係佔整個集資金額6.6%，唔太重要喎。