當年今日
關於我們

【李華華Online】盈富基金年報寫錯年份 專家:英文版冇錯就得

蘋果日報 2019/09/04 21:00

李華華

上市公司年報幾百頁咁厚,出現Typo就好閒,但係盈富基金(2800)嘅2019年中期年報雖然只得19版,但「資產淨值報表」嗰欄,日期明明應該係「二零一八年十二月三十一日」,佢竟然寫咗「二零一九年十二月三十一日」,豈不是預測未來?
話說本身有人同華華投訴呢個錯誤,英文版就冇出現呢個問題嘅,不過如果有人因為睇錯中文版而作出投資,如果追究起上嚟,後果會否好嚴重呢?
信永中和管理合夥人盧華基(Roy)同華華講話,香港上市規則一切以英文版為準,中文版只係翻譯錯誤,屬手民之誤,對比英文版出錯嘅嚴重程度低好多,而且好多公司慣例會列明「在進行任何交易以英文版為準」等字眼,所以真係有錯嘅話,公司毋需負責任。不過如果係A股,由於文件一向以中文版為主,就好難一概而論。
如果有投資者因為年報錯誤資料引致投資失利,可唔可以去索償呢?立信德豪會計師事務所董事林鴻恩(Andrew)話,投資者要證明自己係因為睇咗呢啲錯誤資料而導致有投資損失,呢個門檻喺香港都頗高。佢認為公司至少要喺聯交所刊登澄清聲明,亦應該印刷正確嘅年報畀股東,「其實依家通告咁多,呢啲情況屢見不鮮。」唔知盈富基金幾時會通告澄清返呢?
李華華
empty
英文版就正確嘅。