【操盤手札記】2020中美鬥維穩（割柑人）
蘋果日報 2019/12/23 18:00
割柑人操盤手札記
澳門回歸20年，阿爺卻未送上傳說中嘅禮物——澳門證券交易所，但就誇讚澳門係「一國兩制」典範。「一國兩制」喺人口2,360萬嘅台灣被拒，喺人口750萬嘅香港撞板，喺人口67萬（猶如觀塘）、國際化程度低嘅澳門就成樣板。係咪成功，你話呢？
不過，阿爺「揚澳抑港」昭然若揭。過往，中央多番力谷上海、深圳作為國際金融中心，奈何滬深唔係「一國兩制」，資本賬未開放，人民幣未自由兌換。澳門雖然係「一國兩制」，但法制、專才在在不足，要做香港Plan B，大前提係國際信心！
上周末，特朗普同習近平傾電話，之後放風，好快簽署首階段貿易協議。美國貿易代表萊特希澤就預告1月初簽署，仲首次披露會喺簽署後30日生效，即係2月。貿易協議好事近，加上人行連日放水同1月有望降準，利好股市。
平安夜前夕，恒指開市突破28,000關，但疲態顯露，收27,906，升35點。聖誕假期臨近，成交縮減三成至656億元。睇技術走勢，恒指仍處上升通道，繼續挑戰通道頂28,400水平，而10天線升近250天線27,500水平，成為短線重要支持。
2020年將至，環球經濟「穩」字行頭，中國保六、美國大選、英國脫歐，各國經濟求穩，央行幣策趨寬。市場憧憬人行1月降準，應付春節期間資金需求，以及地方政府專項債發行。另外，國務院近日決定再推稅務優惠，零售消費股可望受惠。
當中，具有科技元素嘅阿里巴巴（9988），在港上市即將滿月，股價連日破頂。美股投資者轉倉嚟港股未停，至今轉倉625.6億元。市場憧憬北水未來可買賣阿里，唔排除資金提前部署。阿里現價208.4元，喺未有蟹貨下，可望繼續尋頂，按區間幅度計，上望220元。