歐洲國家盃A組第三輪分組賽，瑞士對東道主法國嘅比賽，踢完半場雖然無入波，不過瑞士喺一項統計就遙遙領先高盧雄雞。

講緊嘅係爛波衫嘅數目呀！上半場嘅45分鐘之內，瑞士就有三位球員嘅波衫畀人扯爛，先後美密迪喺法國嘅禁區裡邊畀沙格拿扯爛件波衫，之後就輪到早排轉會阿仙奴嘅中場格列沙加中招，畀法國中場保羅普巴喺一次鏟波當中扯爛件波衫，加上前鋒比列安保路果件衫都爛埋，搞到瑞士一個半場就有幾件波衫報銷。到底係瑞士啲波衫質素太差，抑或係法國嘅球員太大力呢？