俾議員同輿論狂轟後，地鐵終於從善如流，將喺地鐵講粗口可以被判坐監嘅法例修改，只係罰款了事，香港市民成功保障言論自由空間。呢條咁騎呢嘅法例，唔單止令全城譁然，甚至成為國際笑柄，有啲外國駐港領事睇新聞知道「亞洲國際都會」竟然有啲咁嘅「惡法」，都不禁失笑。

日前立法會主席范太宴請各國駐港領事同議員食飯，飲紅酒期間大家天南地北無所不吹，有議員提到近排傾緊條騎呢法例，就係搭地鐵爆粗可能要坐監，駐港領事都係見過世面者，知道好多國際大都會都冇咁騎呢嘅法例。香港自稱國際化，言論自由空間竟然唔包括地底，人人當奇聞咁聽。
據講有個非洲國家外交官話，非洲一啲國家對涉及種族及宗教歧視嘅言論有好嚴格限制，但爆粗要坐監就罕有聽聞，言下之意，暗示香港仲落後過非洲。八方搵過資料，明文規定話搭地鐵講粗口可能要罰坐監，可能係香港獨有；新加坡地鐵只係禁止乘客滋擾其他乘客或令其他乘客感到厭惡，國內《鐵路法》第65條規定，乘客不得喺列車內尋釁滋事、侮辱婦女，否則屬刑事罪，兩個地方都冇指明爆粗犯法，不過字眼都幾含糊，有辣有唔辣啦。