自從上仗中國隊對威爾斯時，有眼利球迷發現中國隊唔少球員落場時，都要用膠布包住身體有紋身嘅部位，中國足壇就刮起一場「紋身風暴」。到咗今日，有大陸傳媒報道，話足協已經將紋身令下達到球會層面。不過，外援又可以豁免，真係要替大陸球員講句「公平咩！」

中國盃今日上演季軍戰中國對捷克，從鏡頭都捕捉到唔少有紋身嘅中國隊球員，好似譚龍同埋何超咁，都見到佢地手上無喇喇多咗啲膠布，似乎就係用嚟遮住手臂上嘅紋身。而今日《大連日報》嘅記者就係微博爆料，指足協已經將紋身令要求下達到球會，如果球員露出紋身，仲可能唔畀喺聯賽上陣，球會要用盡辦法解決球員紋身嘅問題。但最吊詭就係，外援係唔會受紋身令影響，今鋪真係「一國兩制」。

--------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM