財爺曾俊華認真鬼馬。佢噚日出席十三五規劃論壇，講完一帶一路、中國機遇等悶嘢之後，被主持人要求用一隊球隊比喻香港，財爺牽一牽嘴角話「Leicester（李斯特城）喇。」主持人叫佢解釋一下，佢就笑一笑話「大家自己研究喇。」咁就揚長而去。
需知道李斯特城嘅故事引人入勝，財爺究竟覺得邊個層次代表香港呢？
英超球隊李斯特城上季一度落入降班漩渦，最後護級成功，今季脫胎換骨，正領先英超榜首，衝擊創會以來首個頂級聯賽冠軍寶座。有咁嘅成績，一定要全部人團結先得，財爺係咪想叫香港人團結，就可以重上高峯呢？

新領隊加盟後脫胎換骨

李斯特城突飛猛進，亦有另一個重要原因。話說舊年暑假，李斯特城嘅泰國班主維猜邀請全隊人去泰國訪問，其間爆出領隊皮雅臣個寶貝仔占士皮雅臣同另外兩名隊員捲入淫片醜聞，連累阿爸都冇得留低。球會7月易帥，由雲尼亞里接任，之後，李斯特城嘅表現就衝上雲霄了。
財爺究竟想暗示，香港有人捲入醜聞要走人，定係簡單啲講，香港要換領導人先有前途？真係冇人知，財爺噚日又講完就走，留低嘅想像空間，有成個李斯特城咁大（即係73.32平方公里咁上下）。
撐開港隊嘅財爺，星期四又會唔會坐定定，睇港隊作客卡塔爾嘅世界盃外圍分組賽呢？財爺入場前聽到呢個問題，冇答到。

李華華
mailto:[email protected]