【接狄龍棒】譚俊彥演包青天預有比較 姚子羚爆三角戀結局
姚子羚狄龍三個結局
譚俊彥、曹永廉、張振朗、姚子羚、胡定欣、陳凱琳同龔嘉欣等,今日着上大台劇《包青天再起風雲》古裝造型出席拜神活動,狄龍囝囝譚俊彥以包青天造型出場,25年後接棒演包青天呢個深入民心嘅角色,算係「子承父業」,問到有冇向爸爸狄龍「取經」,睇吓可以點演包青天,譚俊彥就話爸爸給予許多寶貴意見,爸爸亦教佢要做好演員本份,準時開工、尊重導演及劇組人員。
話晒狄龍演包青天相當經典,譚俊彥會唔會擔心被觀眾比下去,譚俊彥直言入行至今廿年,自己都聽到好多呢類嘅聲音,自己都有心理準備會被比較,笑指壓力大係因為要努力吸金養起頭家。
咁佢壓力真係唔細,原來譚俊彥都想爸爸狄龍可以退休享福,佢指早前同爸爸去馬來西亞拍戲,估計呢套係父子檔喺大銀幕上最後合作,感覺唔錯,爸爸年紀都七十幾歲,應該退休,自己都唔想爸爸太辛苦,只不過爸爸一向好敬業,未必肯唔拍,所以「退休」都係囝囝譚俊彥自己嘅想法。
至於,胡定欣同姚子羚將去新疆同橫店開工,胡定欣坦言擔心天氣凍,到時戲服太單薄;近兩年改為茹素嘅姚子羚,反而擔心開工冇嘢啱食。
今次定欣演女訟師、子羚做驗屍官,喺劇中一齊爭包青天譚俊彥,呢段三角關係講胡定欣鍾意包青天,同時公孫策亦暗戀定欣,子羚就忽然劇透話自己最終都做咗包青天夫人。
講到麥明詩自爆曾遭性侵犯,胡定欣覺得女仔要由細學識保護自己,子羚認為呢種歪風不可助長,能夠憶述過去嘅不快事,並唔容易。
更多娛聞,喺晒《娛果》
http://fb.com/appledailyent