蔡琴喺紅館舉行一連兩場「蔡琴好預兆GOODLUCK演唱會」，噚晚正式開鑼，捧場嘉賓包括鍾楚紅（紅姑）、鄧萃雯及蔣麗萍等。個唱中蔡琴有笑有淚，佢除咗選唱多首經典金曲外，仲唱埋梅艷芳、鄧麗君、劉家昌及鳳飛飛嘅經典歌曲，而鬼馬嘅蔡琴又準備了一個伸縮大魚網，向台下觀眾討利是。

已多次喺香港開騷嘅蔡琴，喺台上妙語如珠，仲兩度掀起全場大合唱，帶動全場氣氛。開場冇耐，蔡琴就介紹喺觀眾席上嘅紅姑，紅姑亦大方企起身，向蔡琴大送飛吻。

蔡琴又憶述當年紅姑往台灣拍戲，兩人相處咗兩個星期，紅姑仲送佢兩對耳環，蔡琴笑謂：「別人是英雄重英雄，我們是美人識美人，紅姑的樣子是愈近愈好看，我是適合遠距離欣賞的，愈看愈耐看。」

喺演唱會中，蔡琴分別選唱咗梅艷芳、鄧麗君、鳳飛飛、劉家昌經典歌曲，佢憶述當年自己喺大會堂開演唱會時，當年仲係新人嘅阿梅前往捧場，事隔數月，阿梅已成為百變巨星。此外，喺演繹鄧麗君嘅《月亮代表我的心》時，佢要求觀眾分成男女生同佢合唱，又笑指可測試大家感情狀況。

蔡琴又為配合新春，佢聲言要向觀眾出奇招討利是，原來佢早有準備，特別搵咗個有伸縮作用嘅大魚網，向台下的觀眾攞利是，結果佢成功攞到唔少大利是，收獲甚豐。