有「後生、靚仔高層」之稱嘅前亞視執行董事盛品儒，月初被影到同「翻版謝安琪」、18歲0靚模Ashina到灣仔夜店「gathering」（新聞連結：bit.ly/U5U7SH），之後被目睹當街猴擒啜爆添！

消息曝光後，就傳出盛品儒去年底同認識嘅澳門有米女友、太陽娛樂老闆周焯華嘅表妹蔡一鳳（Michelle）分手，就連盛生自己都喺facebook話：「要箍煲！」

今日有雜誌就報道，盛品儒喺訪問中，公開承認「攬啜」Ashina係自己過失，又為事件解畫，話嗰件事之前一晚，同Michelle有鬧過交，原本已經想箍煲，但就話自己間科網公司，要搵showgirl做動漫節活動，約咗Ashina出街傾，又解釋自己當日好唔開心飲醉咗，之後唔記得發生咩事，仲話睇番片段，係Ashina主動錫先喎。講講下，佢仲眼泛淚光，話Michelle係佢生命中好重要嘅人，又覺得令Michelle家人受到傷害，感到好痛心...云云

點都好，個報道話，盛品儒真係好後悔，又借訪問時向Michelle公開道歉，除咗喺卡紙上寫道歉字句之外，又舉晒三隻手指發誓，承諾少啲飲酒，同唔會再同女性單獨出街，仲攞住一束玫瑰花影相，求Michelle原諒添！

唔知Michelle睇唔睇到盛生嘅誠意呢？