今年積極賣樓嘅長實，年底前除會推土瓜灣傲雲峰之外，重有打西鐵概念嘅元朗四季雅苑。負責呢次賣樓嘅話事人，唔係以往見慣見熟嘅營業經理，而係一向喺幕後負責廣告同市場推廣嘅廣告部高級經理袁添鴻（洋名Kenneth），加入長實10幾年嘅佢，講到負責前線賣樓，今次可謂初試啼聲。
聽Kenneth講，接手呢個項目有兩個幾星期，雖然話係第一次賣樓，都難唔到佢喎。皆因佢平時做市場推廣同廣告，都好留意客戶嘅需要，認為市場部同營業部屬於同一組工作，只係分工唔同。
噚日朝早，長實帶埋樓盤模型出席中原地產活動，介紹物業資料，項目有成百幾間獨立屋，分2500至3200方呎嘅3房同4房間隔，重連天台同花園，最快1至2周有得睇示範單位。

蔚藍灣畔200米長廊建百噴泉
地鐵坑口站上蓋嘅蔚藍灣畔，發展商信和集團向來注重住客會所設施同園林設計，呢個盤就快開賣，園林布局自然係賣點之一。除咗大灑金錢，花兩億興建18萬方呎會所外，平台花園設計都十分講究。
喺戶外80米大型泳池旁邊，建有一條長達200米嘅長廊，由第1座伸延至第6座，呢條直路上，將設有100個參照意大利式嘅噴泉做襯托，加上燈光效應，都幾夠情調。
大型戶外泳池重包括幾部份，就係溫泉區、水力按摩池同埋足部按摩池，當然唔少得兒童戲水池，幾有睇頭。會所裏面有間供住戶使用嘅2000幾呎「主席屋」，信和重喺售樓處裏面，搭咗個模擬辦畀睇樓人士參觀。