團結香港基金今日舉辦創科博覽，講台上有個大電視屏幕，播出講者演說或者台下嘉賓反應畫面，前特首兼基金主席董建華喺台上一舉一動，有時變成「多重分身」咁；當鏡頭影住台下嘉賓嘅表情反應，配合台上講者手勢，就出現唔少有趣畫面，例如老董喺台上致辭時拍拍手，台下特首林鄭月娥等人又拍拍手附和，老董同林鄭果然幾合拍。

不過，今次老董似乎冇公開送出「董抱抱」，鏡頭所見，2人見面言談甚歡，但只係握握手。佢哋演講時都好一致咁唱好內地創新科技發展，林鄭話要推動創新科技，把握時機係非常重要，講明依家係發展創科嘅黃金時刻。

老董對創科有咩見解？佢話科技顛覆全世界生活方式，溝通交流同商業模式都有前所未有嘅轉變，年輕人依家追捧嘅職業，十幾年後有可能會被取代，話年輕人要努力裝備自己、靈活變通，咁最後當然都係叫本港投身創科行業嘅年輕人周大專生，要為日後到內地發展鋪路。