有請小鳳姐！

尊貴殿堂級歌手徐小鳳又開騷啦，將於9月7-9日及9月14日假紅館舉行四場「金光燦爛徐小鳳演唱會2018」，今次最特別嘅地方，就係山頂位平飛嘅定價僅盛惠$180，可以話係時光倒流十年前嘅舊價，益街坊！

大家請留意番，近年香港百物騰貴，演唱會門票價錢加完又加，平飛價錢加幅超過五成，每張已勁升到$280，好似同樣屬於尊貴級數嘅譚詠麟、許冠傑8月紅館騷「阿Sam & 阿Tam Happy Together Part II演唱會2018」、仲有啱啱喺紅館開完騷嘅張敬軒，平飛都係賣$280，而小鳳姐騷就平足100蚊，相信係照顧「老友記」觀眾。

依家歌星上紅館開演唱會，觀眾除咗最貴嘅飛難撲之外，最平嘅飛同樣好搶手，通常都係第一時間被掃光。難怪小鳳姐開騷消息傳出後，網民對$180門票價錢熱烈地彈琴熱烈地唱，留言：「最重要有$180」、「180門券咁平」。除咗平飛價錢時光倒流之外，今次個唱名同樣好有親切感，事關小鳳姐喺87年、89年、92年、05年、06年嘅演唱會，都係叫做「金光燦爛徐小鳳」。

精選娛聞，喺晒《娛果》
http://fb.com/appledailyent