當年今日

盧海鵬排舞台劇谷氣

蘋果日報 2010/01/05 06:00


盧海鵬及朱咪咪昨日於尖沙嘴為下月公演的舞台劇《審死官》舉行記者會,大會安排咪咪姐送上私伙大奶罩予劇中飾演奶媽的吳浣儀,而鵬哥於台上抱怨眾演員,指有人經常未有出席綵排,咪咪姐表示之前綵排一次後即感壓力,曾一度有辭演的念頭,她說:「原來舞台劇比我想像中難好多,好多對白,而且又要記企位,加上鵬哥要求好高,所以都好有壓力。到時真係記唔到對白,咪袋貓紙囉。」
鵬哥對於咪咪姐感覺壓力大說:「咁又係呀!佢又未接觸過舞台劇,佢原本以為好似拍電視劇咁,都冇辦法o架喇,而且現場冇得出貓紙。」鵬哥表示於台上抱怨之後,希望情況可以改善。至於拍攝亞視節目《香港亂噏》,鵬哥更勞氣說:「上個月已經停咗,原本以為今個月再開,亞視又冇聲氣,不過都好咪專心排舞台劇囉。」
採訪:王崇穎
攝影:陳俊強