張智霖（Chilam）、王陽明、薛凱琪同梁靖琪主演嘅網劇《蝕日風暴》將會喺周六(22號)喺黃Viu煲劇平台播出，不過因為呢套係合拍劇嘅關係，所以大陸嘅觀眾噚晚已經可以率先睇9集！

喺故事一開始，張智霖同王陽明本來一對好兄弟，大家都係毒品調查科嘅同事，點知喺香港同馬來西亞一次毒犯移交，竟然令到呢對好兄弟嘅關係有變，Chilam仲被陷害成為通緝犯，喺馬來西亞過住逃忙嘅生活，飾演王陽明未婚妻嘅薛凱琪，曾經懷疑王陽明嘅失蹤係同Chilam有關，點知喺追查過程，大家竟然因為患難見真情，仲發展一段三角關係！

47歲嘅Chilam孖住35歲嘅王陽明，企埋一齊一啲都唔輸蝕，喺鏡頭前有唔少鎗戰同動作場面，Chilam話：「真係好辛苦，我有啲羨慕梁漢文，聽講佢喺套劇係做花弗男，淨係同女演員有感情戲！」王陽明今次飾演魔警，佢話：「我的角色在開始時是很正面、很陽光，後來受社會影響變得黑暗，就像坐過山車一樣多起伏，實在很刺激，是一個大挑戰！」

精選娛聞，喺晒《娛果》
http://fb.com/appledailyent