銀行競爭咁大，日日都有新產品推出，要引人注目，難度確係好高，所以銀行每次要為產品做推廣，例牌出動一班高層，仲要經常絞盡腦汁，務求令到大家「嘩嘩聲」。
好似渣打，噚日搞咗個「MyDreamAccount」一周年慶祝活動，負責個人銀行業務嘅兩位高層洪丕正（Ben）及禤惠儀（Mary）撐場都嫌唔夠，再搵埋近百個3至6歲嘅小朋友，着晒唔同嘅制服行貓步，場面熱鬧兼cutie到暈。
見到咁多豆丁，勾起兩位高層嘅童年夢想，Ben洪話，細個嗰時希望大個做飛機師，而Mary禤就想做醫生，結果兩位最終齊齊做咗賓卡。

洪丕正難甩身

唔知係咪因為咁，當佢哋見到班小朋友，着住機師制服同醫生袍喺台上行嚟行去時，笑到見牙唔見眼，仲好鬼投入咁打晒拍子，華華真係好少見到平日官仔骨骨嘅Ben洪，好似噚日咁生鬼活潑。
個活動有近百個得幾大嘅豆丁，就算一人一把聲，都已經嘈到拆天，為咗易啲控制佢哋，大會出動咗唔少人手，每人湊幾個，先至叫勉強搞得掂。
影完大合照，呢班小朋友好似仲未玩夠，一啲扭住Ben洪玩givemefive；一啲就對Mary手上嘅米奇錢箱好有興趣，係咁話要睇真啲，兩個大人俾小朋友纏咗一輪，先至成功甩身，而個場清晒之後，就好似年宵散場咁───有排執囉！

讀者如有任何意見或報料，歡迎發送電郵至[email protected]。