中國3D數碼娛樂今日喺影視博覽搞咗個「亞視永恆經典回歸」記招，蕭若元、亞視前藝員陳庭威、劉錫賢、蔡國威及袁潔儀等都有出席。

現年54歲、好耐冇喺香港現身嘅陳庭威，12年出現過喺《亞視百人》，當時佢狀態都好fit，今日佢現身狀態都幾好，個樣唔似54歲，但就似有少少膠膠哋咁...佢表示依家住喺新加坡，佢話：「好多時間喺外國，譬如法國嗰啲，之前喺北京拍過啲人物傳奇嘅劇集，因為太多工作，自己都冇時間休息，依家生活都好簡單，有時忙起上嚟，一個月要拍400幾場戲，每5集換一個導演，連休息嘅時間都冇。」

問到佢嘅家庭狀況係點，陳庭威直言：「目前都仲係單身，如果有婚姻同家庭負擔，個人好容易會老，最重要係keep住有正能量，選擇到自己最喜歡嘅生活環境就OK，生活唔好太緊張。」咁會唔會喺大陸搵個女朋友，佢講：「機會好多，但自己冇時間拍拖，一切隨緣，做人最重要係健康同自由。」

陳庭威於84年畢業於無綫藝員訓練班，曾演出多部無綫劇集。早年曾因對其他女藝人過份熱情，曾被傳媒冠以「人狼威」的不雅稱號。當年曾與陳雅倫拍拖，88年分手後，喺89年年底則與曾華倩拍拖，最後亦告分手。

陳庭威至91年過檔亞視，因拍攝《豪門》及《勝者為王》而打響知名度，之後一直喺亞視拍劇，98年亞視拍攝以林百欣生平為題材的《我來自潮州》，佢仲擔正飾演以林百欣為藍本嘅角色「鄭琛」。