香港政策研究所噚日朝早舉辦「全民國家安全教育日香港研討會」，舊年研討會發言嘅保安局局長李家超，今年就冇再出場，改由一哥盧偉聰發言，不過八方現場聽一哥「煲冬瓜」，唔止聽嘅時候字字驚心，直情可以睇到佢讀稿時候個樣都好吃力，睇得出佢夾硬講唔流利嘅「煲冬瓜」有幾辛苦，佢仲多次讀錯字，好似將「有國才有家」讀成「油果踩油渣」、「絕不姑息」變成「啫bu姑絲」、「果斷執法」講成「果啄止罰」，有網民仲覺得一哥讀「構成」一詞時，好似廣東話粗口諧音，而一哥似乎亦心知自己「煲冬瓜」嘅水平，一度因讀錯字喺台上講「不好意思」，引來台下人士不時失笑。
至於一哥發言講乜？其實咪又係《基本法》列明香港特區係中國不可分離部份，任何鼓吹港獨行為都違反《基本法》，港獨組織宣揚港獨、嚴重危害國家安全，港府會果斷執法取締任何港獨組織之類言論，個個講者講嘅內容差不多，出席人士聽唔聽得明一哥噏乜都分別不大。
李八方