【新增婚禮現場圖片】
現年37歲嘅韓國元祖女團S.E.S成員Bada，今日下嫁細9歲嘅企業家男友。婚禮前Bada與S.E.S另外兩名好姊妹Eugene及Shoo一齊現身畀媒體影相，大晒幸福笑容，不過因為老公係圈外人所以未有現身。

雖然近3月尾，韓國天氣未算好暖，不過Bada依然唔拍凍，身穿吊帶型嘅白色婚紗出鏡。已經為人妻及人母嘅Eugene及Shoo就祝好友幸福，又話好似嫁女咁有啲唔捨得，相當好感情，兩人仲搞鬼叫Bada快啲追上佢哋嘅進度，生返個B。而Bada亦提到婚禮後就會出發去度密月，之後就會投入工作。而喺婚禮現場，有傳媒就成功拍得婚禮場內情況，當中一對新人喺賓客見證下情深咀嘴。

另外，Eugene演員老公奇太映孖住愛囡，以及男團2PM成員澤演、女團2NE1前成員Sandara等人都有出席婚禮。

《蘋果》第十二屆金話梅電影選舉（Golden Plum）又嚟喇!由今日起，請在以下網址（ http://campaign.appledaily.com/goldenplum2017 ）投票，選出心目中的爛片之霸，截止日期係4月6日，賽果將於香港電影金像獎舉行前夕（4月8日）揭曉。