林鄭在落任發展局長前，強行在古物古蹟諮詢委員會開會為西座重新評級前，宣佈拆卸，手法相當惡劣，古諮會主席陳智思投下決定性一票，將西座評為二級，為拆卸開綠燈，引來保育人士不滿，周一決定辭去主席一職。

西座拆卸事件，終於令大家看到好打得局長真面目。早在她上任發展局長之初，發生皇后碼頭事件，她親自會見抗議人士，好似好打得，為她賺到不少民望，但皇后碼頭一樣照拆，到頭來一切只是政治姿態而已。在政府山保育一事上，佢希望能左右逢源，一直拖延決定，如意算盤是拖到煲呔落台前，在欠缺管治意志情況下任由她處置，這時她便變成保育分子，成功爭取保留西座。但政府高層立場不變，並要她執行集體決定，於是惟有硬住頭皮，用極之醜陋方法，將古諮會變回橡皮圖章夾硬嚟。
究竟林鄭對保育有幾上心，抑或只係葉公好龍，講就天下無敵，做就無能為力，大家終於睇到真身。佢兩星期內不斷在傳媒曝光，為自己五年功績塗脂抹粉，都幾惡頂。發展局局長之所以好打得，因為佢從不會打無把握之硬仗。土地供應滯後，源於政府停止造地，已平整之熟地儲備不足應付需求，這是她任內最大失誤，結果由煲呔做了壞蛋孭鑊。馬頭圍劏房塌樓已一年有多，佢喊都喊過幾次，好鬼感性，用以掩飾無法處理劏房問題。至於新界僭建彈弓手，容許村屋起多半層，但就拿梁福元荔枝山莊佔用官地事件，大鑼大鼓將壞蛋祭旗，大快人心。至於村屋僭建，又好快胡混過了關。

新近又出新招，吹水要取消丁屋政策。以佢審慎到加零一之性格，點會係信口開河。佢擺出一副打新界佬姿態，又係為了民望。早早表態不畏土豪劣紳，日後政策上做不到，便由下一手局長孭飛，佢又可以金盆洗手。
世事難料，林鄭抽水政客之作風，在煲呔時代如魚得水，因煲呔肯畀佢老點。但下一手老細振英，本身都係無寶不落抽水王，兩人爭民望鬥抽，將會有一番惡鬥。
添馬男