林欣彤(Mag)今日到商台接受訪問，宣傳新歌《奇怪》，歌曲主題係叫大家唔使理外界嘅批評，淨係做自己，佢話其實都係自己心聲：「尤其是o依家社交網絡咁發達，好多嘢放咗上網就會俾人話，但唔上去又有人講你點解唔蒲頭。」

咁有過啲咩經歷令Mag最唔開心？佢話：「試過有一排因為唔舒服好少上網同出嚟，於是就有人留言問我係咪去咗整容或者係咪俾人包養咗，自己當時睇完都好唔開心。」Mag話o依家嘅佢已經學會唔理呢啲留言，自言面皮厚咗好多。

講到許廷鏗、鄧小巧同陳慧敏等「巨星幫」成員分別同步派歌，Mag話好開心大家都有新作推出，尤其是剛轉會到華納嘅許廷鏗：「我之前有聽過佢新歌，好開心佢搵到新嘅路，希望佢一切順利。」